हावाहुरीले विद्यालय सँगै दर्जनौं घरका छाना उडायो एक शिक्षक सहित ६ विद्यार्थी घाइते

सन्तोष थापा/पर्वत ६ जेठ

विहिबार दिउँसो बर्षा सँगै चलेको हावाहुरीले पर्वतको भुकदेउराली गाविसको एक विद्यालयसँगै एक दर्जन घरका छाना उडाएको छ । हुरीले भुक देउराली १ सेरावेसीमा अवस्थित नवज्योति माविको छाना उडाउँदा एक शिक्षक सहित ६ विद्यार्थी घाइते भएका छन् ।

दिउँसो करिव ३ बजेको समयमा विद्यालयमा पढाई भइरहेको समयमा हावाहुरी चलेको थियेा । हुरीले विद्यालयको ६ कोठे भवनको टिनको छाना उडाउँदा शिक्षक योगेश्वर तिमिल्सेना सहित ६ विद्यार्थी घाइते भएका हुन् । घाइते विद्यार्थी मध्ये कक्षा ८ मा अध्ययनरत सागर अधिकारी अचेत भई एक घण्टा पछि मात्र होस खुलेको थियो । घाइतेहरु विद्यालयमा नै प्राथमिक उपचार पश्चात् घर फर्केका थिए ।

विद्यालयको छानो उडाउँदा चार लाख बराबरको क्षति भएको विद्यालयका प्रधानाध्यापक धनबहादुर केसीले जानकारी दिनुभयो । छानो उडाएपछि शुक्रबारको पढाई स्थगित गरिएको केसीले जानकारी दिनुभयो । शुक्रबार विद्यालय व्यवस्थापन समितिको आकस्मिक बैठक ढाकिएको उहाँले बताउनुभयो ।

सोही गाविसका देवदत्त पौडेलको घरको छाना उडाउँदा करिव ९० मुरी अन्नपात नष्ट भएको शिक्षक केसीले जानकारी दिनुभयो । हावाहुरीका कारण उक्त क्षेत्रका वेतेनी देउपुर डिमुवा कास्कीको सल्यान लगायतका स्थानका एकदर्जन भन्दा बढी घरका छानाहरु उडाएको देउपुरबाट जीवनधर शर्माले जानकारी दिनुभएको छ ।