नारायण उच्च माविको बार्षिकोत्सव

पर्वत, १० बैशाख
पर्वत सदरमुकाम कुश्माबजारमा साचालित जिल्लाकै एकमात्र विज्ञान संकाय भएको नारायण उच्च माविले ४३ औं बार्षिकोत्सव तथा २८ औं अभिभावक दिवस मनाएको छ । विद्यालय स्थापनाको ५० बर्ष पुगेर हालै स्वर्ण महोत्सव मनाएको उक्त विद्यालयले शुक्रबार बार्षिकोत्सव मनाएको हो ।
विद्यालयको बार्षिकोत्सवको उद्घाटन गर्दै जिल्ला शिक्षा अधिकारी नारायण प्रसाद भट्टले राज्यले शिक्षा सम्बन्धि सार्वजनिक गरेको निति र कार्ययोजनालाई सही रुपमा विद्यालयहरुले पालना गरेमा शैक्षिक सुधारमा टेवा पुग्ने बताउनुभएको थियो । नारायण उच्च मावि जिल्लाका अन्य विद्यालयहरुको तुलनामा पटक पटक नमुना विद्यालय बन्न पुगेको स्मरण गर्दै उहाँले अन्य सामुदायिक विद्यालयहरुले समेत गुणस्तरीय शिक्षामा जोड दिनुपर्ने धारणा राख्नुभएको थियो ।
कार्यक्रममा लेखापाल बलबहादुर केसीले २ करोड ६८ लाख बराबरको आय व्यय सार्वजनिक गर्नुभएको थियो । सो अवसरमा विद्यालयले ०६० सालमा लगाएको धान्याचलमा चन्दादान गर्ने पहिलो महिला देवी कुमाललाई सम्मान समेत गरेको थियो । जिल्ला विकास समितिमा कार्यालय सहयोगीको रुपमा कार्यरत कुमालले विद्यालयलाई ५० हजार सहयोग उपलब्ध गराउनुभएको थियो । धनाढ्य वर्गका चन्दादाताहरुले चन्दा बोलेर पनि रकम उपलब्ध नगराएको स्मरण गराउँदै पिछडिएको महिलाबाट पाएको सहयोगको उच्च कदर गर्दै कुमाललाई सम्मानित गरिएको विद्यालयका प्रधानाध्यापक बसन्तकुमार सिकेले बताउनुभयो । धान्याचलमा ६४ लाख बोलकबोल रकम भएपनि ४४ लाख रुपैंया अझै उधारो चन्दाको रुपमा सिमित रहेको छ ।
कार्यक्रममा २०६५ सालमा एसएलसी परिक्षामा विद्यालयबाट उत्कृष्ठ अंक प्राप्त गर्ने छात्रा सुस्मा आचार्यलाई नारायण उच्च मावि भूतपुर्व विद्यार्थी संघले पुरस्कत गरेको थियो ।
विद्यालय व्यवस्थापन समितिका अध्यक्ष रमाकान्त शर्माको अध्यक्षतामा सम्पन्न बार्षिकोत्सव कार्यक्रममा शिक्षक अभिभावक संघका अध्यक्ष हेमनाथ आचार्य भुपुविद्यार्थी संघका अध्यक्ष बसन्तकुमार कर्माचार्य विद्यार्थी रामकृष्ण लामिछाने विद्यालयकी छात्रा मिनु अधिकारी खरेहा प्राविका प्रअ नारायण गिरि अभिभावक गंगाआचार्य लगायत अन्य विभिन्न राजनीतिक दलका प्रतिनिधिहरुले मन्तव्य राख्नुभएको थियो ।