शिक्षक कुटिएको मानवअधिकारकर्मीहरुको विरोध

पर्वत ५ पुस
एकीकृत नेकपा माओवादीले आव्हान गरेको हड्तालका क्रममा बन्दकर्ताको कुटपिटबाट पर्वतको सदरमुकाम कुस्माबजार स्थित नारायण उच्चमाबिका दुई शिक्षक कुटिएका छन् । शिक्षक माथि भएको कुटपिटको विरोधमा पर्वतमा कि्रयाशिल विभिन्न मानवअधिकारवादी संघसंस्थाहरुले विरोध जनाएका छन् । 
आइतबार विहान सदरमुकाम कुश्माबजार स्थित नारायण उच्च माविका प्राचार्य तथा नेपाल शिक्षक संघका केन्द्रिय उपाध्यक्ष वसन्तवहादुर सिके र सोही बिद्यालयका शिक्षक तथा नेपाल पत्रकार महासंघ पर्वतका कार्यसमिति सदस्य गोविन्द पोखरेल माथि माओवादी कार्यकर्ताले कुटपिट गरेका थिए । सो को विरोधमा नागरिक साजाल पर्वत नेपालपत्रकार महासंघ पर्वत मोदीकाली साप्ताहिक मानवअधिकार तथा शान्ति समाज पर्वत नेपाल बार एशोसिएसन इन्सेक प्रतिनिधिको कार्यालय पर्वत मानवअधिकार तथा जनसरोकार समिति पर्वत र गैरसरकारी संस्था महासंघ पर्वतले संयुक्त विज्ञप्ति जारी गरी घटना प्रति विरोध जनाएका छन् । 
बन्दको नाममा माओवादीले नागरिकहरुलाई स्वतन्त्ररुपमा हिडडुल गर्ने व्यापार व्यावसाय गर्ने अधिकारबाट बिाचत बनाएको विज्ञप्तिमा उल्लेख छ । विज्ञप्ति मार्फत उनीहरुले घटनामा संलग्न दोषीलाई कार्बाही गर्न समेत सरकारसमक्ष माग गरेका छन् ।
घाईते शिक्षक पोखरेललाई उपचारका लागि पर्वत जिल्ला अस्पतालमा भर्ना गरिएको छ भने सिके को अवस्था सामान्य रहेको छ । वन्द गर्न आग्रह गर्दै हिडीरहेको जुलुसले विद्यालयमा पठनपाठन भैरहेको देखेपछि बिबाद भएको थियो । हड्तालका दिन विद्यालय नखोल्न प्राचार्य सिके समक्ष अनुरोध गर्दा शिक्षक पोख्रेलले मानवअधिकारकर्मीको धाक देखाएर चर्का कुरा गरेपछि कार्यकर्ताहरु आक्रोशित बनेको माओवादी जिल्ला सेक्रेटरी कृष्ण विकले जानकारी दिनुभयो । उहाँले कार्यकर्ताहरुले सामान्यरुपमा हातपात गरेको स्वीकार्नुभयो ।